መቐለ፥መስከረም13/2017ዓ/ም(ቴሌቪዥን ትግራይ)
ሎማዓንቲ ሶኑይ ቀፂሉ ኣብ ዝተሳለጠ ቀዳማይ ሰሙን ግጥማት ፕሪሚየር ሊግ ኢትዮጵያ 2017 ዓ/ም ፈለማይ ፀወትኣ ዘካየደት ጋንታ ስሑል ሽረ ኣብ ልዕሊ ኣዳማ ዓወት ኣመዝጊባ።
ኣብቲ ፀወታ ጋንታ ኣዳማ ኣብ መበል 12 ደቒቓ ነቢል ኑሪ ብዘመዝገባ ጎል ምምራሕ ጀሚራ ዋላ እኳ እንተነበረት ስሑል ሽረ ኣብ መበል 27 ደቒቓ ካብ ኤልያስ ኪታታ ኣብ መበል 57 ደቒቓ ካብ ኣላዛር ኣድማሱን ብፀወታ ኤልያስ ኣሕመድ ድማ ኣብ መበል 85 ደቒቓ ብፍፁም ቕላዕ ብዘመዝገብወን ጎላት ተሰንያ ሰለስተ ንክልተ ተዓዊታ።
ድሕሪ ኣርባዕተ ዓመታት ዳግም ናብቲ ሊግ ዝተመለሰት ብኣሰልጣኒ ጌታቸው ዳዊት ትምራሕ ጋንታ ስሑል ሽረ ኣብ ፈላማይ ፀወትኣ ዝሓሽ ምንቅስቃስን ፈተነ ጎልን ኣካይዳ እያ።
ጋንታ ስሑል ሽረ ናብቲ ሊግ ካብ ዝተመለሳ ጋንታታት ትግራይን ኣብ 2017 ዓ/ም ናብቲ ሊግ ካብ ዝደየባ ጋንታታትን ኣብ ቀዳማይ ሰሙን ግጥማት እቲ ሊግ ሙሉእ ሰለስተ ነጥቢ ዝረኸበት ፈላመይቲ ጋንታ ኮይና።
ዝሓለፈ መስከረም 10/2017 ዓ/ም ኣብ ከተማ ድሬዳዋ ምክያድ ኣብ ዝጀመረ ግጥማት ፕሪሚየር ሊግ ኢትዮጵያ ፈላማይ ፀወትአን ዘካየዳ ጋንታታት መቐለ 70 እንደርታን ወልዋሎ ዪ/ዓዲግራት ስዕረት ምትእንጋደን ይዝከር።
ኣብ ካልኣይ ሰሙን ግጥማት ፕሪሚየር ሊግ ኢትዮጵያ 2017 ዓ/ም መፃኢ ሓሙስ መቐለ 70 እንደርታ ምስ ፋሲል ከነማ ፣ ዕለተ ዓርቢ ድማ ወልዋሎ ዪ/ዓዲግራት ምስ ቅዱስ ጊዮርጊስ ፣ ስሑል ሽረ ምስ ሃዋሳ ክራኸባ እየን።
#ክብሮም ተስፋይ
