መቐለ፥ 5 ጳጕሜን 2016 ዓ.ም (ቴሌቪዥን ትግራይ)_ዓሲምባ ዲሞክራስያዊ ውድብ በዓል ሓድሽ ዓመት ምኽንያት ብምግባር ውድባዊ መግለፂ ብምሃብ ሰናይ ትምኒቱ ገሊፁ።
ህዝቢ ትግራይ ብልፍንታውያን ወረርቲ ንልዕሊ ክልተ ዓመት ኲናት ዘርኣዊ ፅንተት ገጢምዎ ከምዝፀንሐን ድሕሪ ውዕል ፕሪቶርያ ካብ ድምፂ ቶኽሲ እፎይታ ከምዝረኸበን ይገልፅ።
ውዕል ፕሪቶርያ ብዘይምትግባሩ ህዝቢ ትግራይ ሓዚ እውን ብወረርቲ ሓይልታት ይሳቐ ኣሎ ኢሉ።
ኣብ ሱዳን ዝርከቡ ስደተኛታት ሓዊሱ በቢቦትኡ ተመዛቢሉ ዝርከብ ህዝቢ ናብ መረበቱ ኣይተመለሰን፣ ብመንነቶም ዝተኣሰሩ ተጋሩ ኣይተፈትሑን፣ ሰራሕተኛታት መንግስቲ መሃየኦም ኣይተኸፈሎምን፣ ሰኣን ውሑስ ፀጥታ ደቂ ኣንስትዮ ይድፈራን ይጭወያን ኣለዋ ዝበለ ውድብ ዓሲንባ እዞም ፀገማት ክፈትሑን ኣብ ትግራይ ልምዓት፣ሰላም፣ፍትሒ፣ሰናይ ምምሕዳርን ዲሞክራስን ክመፅእ ብህዝቢ ዝተውሃቦም ሓላፍነት ንጎኒ ብምግዳፍ መራሕቲ ህወሓት ንስልጣን ዝገብርዎ ዘለው ውጥጥ ከምዝኹንን እውን ሓቢሩ።
ወረርቲ ሓይልታት ካብ ግዝኣት ትግራይ ክወፁ፣ ተመዛበልቲ ናብ መረበቶም ክምለሱ፣ ፀገም ፀጥታ ክፍታሕ፣ ብመንነቶም ዝተኣሰሩ ክፍትሑ፣ ግዝያዊ ምምሕዳር ትግራይ ንኹለን ውድባት ዝሓቁፍ መንግስቲ ከጣይሽን ዝፅውዕ በዓል ሸውዓተ ነጥቢ መግለፂ ቅዋም አውን ኣውፂኡ ውድብ ዓሲንባ።
