ጋንታታት ወልዋሎ ዪ/ዓዲግራትን ቅዱስ ጊዮርጊስን ዘራኸበ ፀወታ ብዓወት ቅዱስ ጊዮርጊስ ተዛዚሙ።

መቐለ ፥ መስከረም 17/2017 ዓ/ም(ቴሌቪዥን ትግራይ )

ኣብ ካልኣይ ሰሙን ግጥማት ፕሪሚየር ሊግ ኢትዮጵያ 2017 ዓ/ም ዝተራኸባ ጋንታታት ወልዋሎ ዪ/ዓዲግራት ን ቅዱስ ጊዮርጊስን ብዓወት ጋንታ ቅዱስ ጊዮርጊስ ክልተ ንሓደ መፈፀምታ ረኺቡ።

ቅዱስ ጊዮርጊስ ኣብ ሻብዓይ ደቒቓ ፍፁም ጥላሁን ጎል ኣመዝጊቡ ሓደ ንባዶ መሪሓ እኳ እንተነበረት ወልዋሎ ዪ/ዓዲግራት ብዙሕ ከይፀንሐት ኣብ መበል 13 ደቒቓ ብመገዲ ኪሩቤል ወንድሙ ተመዓራርያ ጎል ኣመዝጊባ።

ኣብ ቀዳማይ ሰሙን ግጥማት ፕሪሚየር ሊግ ነጥቢ ደርቢየን ዝተራኸባ ክልቲአን ጋንታታት ፈለማይ ዓወት ንምርካብ ብርቱዕ ንሕንሕ ዘካየዳ ኮይነን ኣማኑኤል ኤርቦ ኣብ መበል 71 ደቒቓ ቅዱስ ጊዮርጊስ ሙሉእ ሰለስተ ነጥቢ ክትረክብ ዘኽኣለት ጎል ኣመዝጊቡ።

ጋንታ ወልዋሎ ዪ/ዓዲግራት ኣብ ሳልሳይ ሰሙን ግጥማት እቲ ሊግ ሓሙስ መስከረም 23 /2017 ዓ/ም ምስ ጋንታ ሲዳማ ቡና ክትፃወት እያ።