መቐለ፥ መስከረም 20/2017 ዓ/ም (ቴሌቪዥን ትግራይ )
ሎማዓንቲ ሶኑይ ኣብ ከተማ ድሬዳዋ ኣብ ዝተሳለጠ ሳልሳይ ሰሙን ግጥማት ፕሪሚየር ሊግ ኢትዮጵያ 2017 ዓ/ም መቐለ 70 እንደርታ ን ቅዱስ ጊዮርጊስ ሓደ ን ባዶ ሲዒራ።
ኣብቲ ጋንታታት መቐለ 70 እንደርታን ቅዱስ ጊዮርጊስን ዘራኸበ ፀወታ ኣብዚ ናይዚ ዓመት ግጥማት ፕሪሚየር ሊግ ኢትዮጵያ ዝነኣድ ምንቅስቃስ ዘካይድ ዘሎ ያሬድ ብርሃኑ ድሕሪ ዕረፍቲ ኣብ መበል 51 ደቒቓ ብዘመዝገባ ጎል እዩ እቲ ፀወታ ብዓወት ጋንታ መቐለ 70 እንደርታ ሓደ ን ባዶ ተዛዚሙ።
ድሕሪ እታ ዝተመዝገበት ጎል ተፃወቲ ጋንታ ቅዱስ ጊዮርጊስ ማዕረ ትገብሮም ጎል ንምርካብ ፈተነታት ኣካይዶም ዋላ እኳ እንተነበሩ ተፃወቲ ጋንታ መቐለ 70 እንደርታ ውፅኢት ዓቒቦም ወፅዮም እዮም።
ኣብቲ ፀወታ ነታ ብሕታዊት ጎል ዘመዝገበ ያሬድ ብርሃኑ ኣብ ግጥማት ካልኣይ ሰሙን እቲ ሊግ መቐለ 70 እንደርታ ምስ ፋሲል ማዕረ ሓደ ን ሓደ ኣብ ዝተፈላለየትሉ ግዘ ንጋንትኡ ጎል ምምዝጋቡ ይዝከር።
ዛጊድ ካብ ዘካየደቶም ሰለስተ ግጥማት 4 ነጥቢ ዘዋህለለት ጋንታ መቐለ 70 እንደርታ ኣብ ዝቕፅል ራብዓይ ሰሙን ምስ ጋንታ መቻል ክትራኸብ እያ።
ኣብ መርሃ ግብሪ ሳልሳይ ሰሙን ግጥማት ፕሪሚየር ሊግ ኢትዮጵያ 2017 ፅባሕ ሰሉስ ሰዓት 10:00 ጋንታ ስሑል ሽረ ምስ ፋሲል መፃኢ ዕለተ ሓሙስ ድማ ወልዋሎ ዪ/ዓዲግራት ምስ ሲዳማ ቡና ክፃወታ እየን።
