መቐለ፥ መስከረም 17/2017 ዓ/ም (ቴሌቪዥን ትግራይ )
ድሕሪ ኣርባዕተ ዓመታት ዳግም ናብ ፕሪሚየር ሊግ ኢትዮጵያ ዝተመለሰት ጋንታ ስሑል ሽረ ኣብ ካልኣይ ሰሙን ግጥማት ፕሪሚየር ሊግ ኢትዮጵያ ምስ ሃዋሳ ተፃዊታ ማዕረ ሓደ ንሓደ ብምፍልላይ ሓደ ነጥቢ ረኺባ።
ሎማዓንቲ ዓርቢ ረፋድ ኣብ ስታድየም ድሬዳዋ ፀወታ ዘካየዳ ጋንታታት ስሑል ሽረን ሃዋሳን ቅድሚ ዕረፍቲ ባዶ ንባዶ እየን ፀወትአን ዛዚመን።
ድሕሪ ዕረፍቲ ዝሓሸ ምንቅስቃስ ዘካየደት ጋንታ ስሑል ሽረ ኣብ መበል 48 ደቒቓ ፋሲል ኣስማማው ካብ መሓመድ ኣብዱለጢፍ ዝተሸጋረትሉ ኩዕሶ ናብ መረበብ ብምፅንባር ስሑል ሽረ መሪሕ ክትከውን ኣኽኢልዋ።
ጋንታ ስሑል ሽረ እቲ ፀወታ ክዛዘም ሒደት ደቓይቕ ክሳብ ዝተርፎ ሓደ ንባዶ ምምራሕ ኪኢላ ዋላ እኳ እንተነበረት ኣብ ተወሳኺ መበል 93 ደቒቓ ተፃዋቲ ስሑል ሽረ መሓመድ ሱሌይማን ናይ ባዕሉ ብዘመዝገባ ጎል እቲ ፀወታ ብማዕረ ውፅኢት መፈፀምታ ረኺቡ።
ኣብ ክልተ ፀወታ ሓደ ዓወት ሓደ ድማ ማዕረ ብምፍልላይ ዝነኣድ ብቕዓት ወኒና ትርከብ ጋንታ ስሑል ሽረ ኣብ ሳልሳይ ሰሙን ግጥማት እቲ ሊግ ሰሉስ መስከረም 21/2017 ዓ/ም ምስ ፋሲል ክትፃወት እያ።
ግጥማት ካልኣይ ሰሙን ሎማዓንቲ ዓርቢ ሰዓት 10:00 ብምቕፃል ወልዋሎ ዪ/ዓዲግራት ምስ ቅዱስ ጊዮርጊስ ከራኽብ እዩ።
