መቐለ ፥ መስከረም 16/2017 ዓ/ም (ቴሌቪዥን ትግራይ)
ሎማዓንቲ ሓሙስ ቀፂሉ ኣብ ዝተሳለጠ ካልኣይ ሰሙን ግጥማት ፕሪሚየር ሊግ ኢትዮጵያ 2017 ዓ/ም ምስ ፋሲል ከነማ ፀወትኣ ዘካየደት ጋንታ መቐለ 70 እንደርታ ብማዕረ ውፅኢት ተፈላልያ።
ጋንታ መቐለ 70 እንደርታ ኣብቲ ፀወታ ያሬድ ብርሃኑ ኣብ መበል 27 ደቒቓ ብዘመዝገባ ጎል መሪሕ ምዃን ኪኢላ ዋላ እኳ እንተነበረት ጋንታ ፋሲል ኣብ መበል 65 ደቒቓ ካብ ቢንያም ላንቃሞ ማዕረ ትገብራ ጎል ኣመዝጊባ እቲ ፀወታ ብማዕረ ውፅኢት ተዛዚሙ ሓሓደ ነጥቢ ተማቒለን።
ተፃወቲ ክልቲአን ጋንታታት ተወሰኽቲ ጎል ንምምዝጋብ ዘኽእሎም ዕድል ረኺቦም ከይተጠቐምሉ ተሪፎም እዮም።
ጋንታ መቐለ 70 እንደርታ መስከረም 20 /2017 ዓ/ም ኣብ ሳልሳይ ሰሙን ፕሪሚየር ሊግ ኢትዮጵያ ምስ ጋንታ ቅዱስ ጊዮርጊስ ክትራኸብ እያ።
ካልኣይ ሰሙን ግጥማት እቲ ሊግ ፅባሕ ቀፂሎም ክካየዱ እዮም ጋንታታት ወልዋሎ ዪ/ዓዲግራትን ስሑል ሽረን ድማ ፀወታ ክህልወን እዩ።
ብኣሰልጣኒ ጌታቸው ዳዊት ትምራሕ ጋንታ ስሑል ሽረ ረፋድ ሰዓት 3:30 ምስ ጋንታ ሃዋሳ ክትፃወት እያ። ኣብ ቀዳማይ ሰሙን ንኣዳማ ሰለስተ ንኽልተ ብምስዓር ብፅቡቕ ውፅኢት ዝተበገሱ ተፃወቲ ጋንታ ስሑል ሽረ ምስ ሃዋሳ ውን ዝሓሸ ምንቅስቃስ ከርእዩ ትፅቢት ይግበር።
ብተመሳሳሊ ዕለተ ዓርቢ ሰዓት 10:00 ኣብ ስታዲየም ድሬዳዋ ምስ ቅዱስ ጊዮርጊስ ፀወትኣ ተሳልጥ ጋንታ ወልዋሎ ዪ/ዓዲግራት ፈላማይ ዓወት ንምምዝጋብ ብርቱዕ ንሕንሕ ከተካይድ ቅድመ ግምት ረኺባ ኣላ።
#ክብሮም ተስፋይ
