ኣብ ወረዳ ኣፅቢ ስፍሓት ዘለዎ ዕስለ ኣምበጣ ከም ዝተርኣየ ምምሕዳር እታ ወረዳ ኣፍሊጡ።

ማሓዳሪ እቲ ወረዳ መምህር መዝገበ ግርማይ እቲ ዕስለ ኣምበጣ ኣብ ዝተፈላለዩ ጣብያታት ብስፍሓት ተራእዩ ከም ዘሎ ንትግራይ ቴሌቪዥን ብስልኪ ኣብ ዝሃብዎ ሓበሬታ ሓቢሮም።ዛጊድ ድማ ኣብ ዝራእቲ ሓደጋ ምብፃሕ ጀሚሩ ከም ዘሎ ዝሓበሩ እቶም ኣመሓዳሪ ምስ ህዝቢ ብምትሕብባር ናይ ምብራር ስራሕቲ ይስረሑ እኳ እንተሃለው እዚ ነቲ ገጢሙ ዘሎ ሰፊሕ ዕስለ ጠጠው ከብሎ ስለዘይኽእል ቢሮ ልምዓት ሕርሻን ሃፍቲ ተፈጥሮን ትግራይ ምስ ሚኒስትሪ ሕርሻ ብምዝርራብ ካብቲ ዝብገሰሉ ዘሎ ከባቢ በራሕለይ ጀሚሩ ስራሕቲ ነፀጋ ኬሚካል ክግበር ከም ዝግባእ ፀዊዖም።