ጋዜጠኛ ሃይሉ ገሰሰ ኣብ ቴሌቭዥን ትግራይን ቴሌቭዥን ኢትዮጵያ ንልዕሊ 30 ዓመታት ዝሰርሐ ኮይኑ ዘይሃስሱን ዓበይቲ ማሕበራዊን ቁጠባዉን ታሪኻዊን ሓድግታት ዝድህስሱ ሰነዳዊ ፍልምታት ብምስራሕ ዝፍለጥ ብዓል ዉሕሉል ሞያ ጋዘጠኝነት ኮይኑ ሓሊፉ እዩ፡፡
ጋዜጠኛ ሃይሉ ገሰሰ ካብ ጀማሪ ጋዜጠኛ ክሳብ ላዕለዋይ መሪሒነት ሚድያ ኮይኑ ኣገልጊሉ እዩ፡፡
ጋዜጠኛ ሃይሉ ገሰሰ ካብ ሞያ ጋዜጠኝነት ብተዘማዲ ጉዕዞ ዕቤት ሚድያ እዛ ዓዲ ዝሐሸ ክብርን ወደሳን ዝረኸቡ ዓበይቲ ሰነዳዊ ፊልምታትን መድርኻትን ዳይሬክት ዝገበረን ብዉፍይነት እዉን ዝኣለየ ምስጉን ጋዜጠኛ ነይሩ፡፡
ዕጡቓት ሰንበት፤ዕጣን ዘሮ፤ገዳም ኣሲራ መቲራ፤መገሻ ዓዲ ኩናማን መንገዲ ኣርሆን ቀያሕቲ እምባታት ዝብሉ ታሪኻዊ፤ማሕበራዊ፤ቁጠባዊን ባህላዊን ክብርታት ህዝቢ ትግራይን ዓፋርን ዝድህስሱ ዕምቆትን ፍልጠትን ዘለዎም ዓበይቲ ሰነዳዊ ፍልምታት ካብ ዝሰርሖም ስራሕቱ እቶም ብዋናነት ዝጥቀሱ እዮም፡፡
ጋዜጠኛ ሃይሉ ገሰሰ መሳርሕቱ ብዓቕሚ ብሞያ ብኽእለትን ብፍልጠትን ንምብቃዕ ዝሰርሐን ብመሳርሕቱ ክብርን ናእዳን ዝረኸበ ጋዜጠኛ ነይሩ፡፡
ጋዜጠኛ ሃይሉ ገሰሰ ካብ ኮተቤ መምህራን ኮሌጅ ድፕሎማ፤ካብ ኣዲስ ኣበባ ዩኒቨርሲቲ ብሞያ ጋዜጠኝነት ቀዳማይ ድግሪ፤ካብ መቐለ ዩኒቨርስቲ ብስነ-ፅሑፍን ብመፅናዕቲ ቋንቋታት ወፃኢ ካልኣይ ድግሪ ዝረኸበ ስሙይ ጋዜጠኛን ንኽብሪ ህዝቡን ዓዱን ብሞያኡ ዘገልገለ ወዲ-ህዝቢ ነይሩ፡፡
ስነ-ስርዓት ቀብሩ ሎሚ ሕዳር 27/2016 ዓ/ም ፈተዉቱ ኣዝማዱን ናይ ሞያ መሳርሕቱን መሓዙቱን ኣብ ዝትረኸብሉ ኣብ ከተማ መቐለ ቤተ-ክርስትያን ማርያም ጉግሳ ተፈፅሙ፡፡
ቴሌቭዥን ትግራይ ንስድራ ጋዜጠኛ ሃይሉ ገሰሰ፤መሳርሕቱን መሓዝቱን ምፅንዕናዕ ይምነ፡፡
ብኣብሪሃ ካሕሳይ
